موضوعنا النهاردة في سلسلة المواد الفعالة هيكون عن
مادة الإيثريل 
نركز لإن الموضوع مهم جدا و زى ما المادة دي مهمة جدا في الزراعة ليها كمان تأثيرات ضارة جدا لو ما اتبعناش اللازم 
تعالوا نتعرف على ايه هي مادة الايثريل دى 
من منظمات النمو النباتية بنستخدمها على نطاق واسع في الزراعة ولما بتمتص من النبات بتطلع غاز الإيثيلين وده هرمون نباتى طبيعى بيأثر على العمليات الفسيولوجية
التركيب الكيميائى C₂H₆ClO₃P
المجموعة الكيميائية من مشتقات حمض الفوسفونيك العضوية
يالا نعرف استخدمها في الزراعة
بيسرع النضج في الفواكه وبيوحد توقيت النضج والحصاد
بيحفز الازهار واحيانا بيستخدم في التزهير الانثوى في بعض النباتات زى القرعيات
بيقلل النمو الخضرى وبيسيطر على النمو الزايد في بعض الأشجار زى التفاح
بيسهل الحصاد عشان بيسهل تساقط الأوراق قبل الحصاد وبيسهل جمع الالياف
بيزود تدفق مادة اللاتكس في أشجار المطاط
بيشيل الازهار والفاكهه الزايدة ونقدر نستخدمه لإزالة الحمل الزايد من الزهور والثمار في الأشجار المثمرة وبيحسن جودة الثمار
طب ايه طريقة استخدامه
️بتعتمد على حاجات كتير زى المحصول ونوع التأثير (نضج ، تحفيز ، تزهير ، إزالة أوراق )
في حاجات عامه هنمشى عليه في استخدام مادة الايثريل
في البداية التحضير للرش
في العادى بنستخدمة بتركيز بين 200 إلى 1200 جزء في المليون (ppm) وبيختلف على حسب نوع المحصول والغرض
يعنى لو نضج في الطماطم هيكون بنسبة 500-1000 جزء في المليون.
ولو إزالة الأوراق في القطن 500-1000 جزء في المليون.
لو تحفيز التزهير في الخيار 200-400 جزء في المليون.
و الاحسن اننا نرجع دايما للإرشادات الخاصة بكل محصول
بنخلطه مع الماء على حسب الجرعة المحدده ونستخدم ماء نظيفه وتكون درجة حرارتها معتدلة عشان التفاعل
ولازم نراعى توقيت الرش وفقا للمراحل الفسيولوجية يعنى لو عاوزين نضج مبكر هنرش عند اقتراب مرحلة النضج بس يكون قبل الحصاد بعدة أيام (7-14 )يوم
لو عاوزين تزهير انثوى في القرعيات هنرش في بداية التزهير او في بداية مراحل الازهار
لو هنشيل الأوراق في القطن هنرش لما الثمار توصل لمرحلة النضج المبدئية
نرش المحلول على الجزء العلوى عشان يغطى الأوراق والاجزاء الخضراء وهنوزعها بشكل متساوى على النبات عشان نحقق افضل النتائج
منرشش في الحر الشديد او عند هبوب الرياح عشان التبخر وكمان منرشش اثناء هطول الامطار
نركز عشان فترة الأمان قبل الحصاد بتختلف حسب نوع المحصول ولازم نستنى من 7 ل21 يوم بعد الرش
ولازم نستخدم قفازات ونظارات واقيه وكمامات واحنا بنتعامل مع الإيثريل ونخزنه في مكان امن وبعيد عن الحرارة والاشعة المباشرة
نركز جدا في اضرار مادة الايثريل
تعالوا نعرفها على النبات
التحلل السريع وإطلاق الايثيلين بجرعات زايدة لو زادت الجرعة عن الموصى بها هيعمل تساقط غير مرغوب للثمار او الازهار وممكن يحصل توقف للنمو او تشوه الأوراق والقمم النامية واصفرار الأوراق وموت الانسجه
هيزود الحساسية للأمراض الفطرية بسبب ضعف جدار الخلية
لو استخدمناه في توقيت غلط ممكن يخفض حجم وجودة الثمار
الثمار اللى عجلنا نضجها هيكون عمرها التخزينى قليل
نيجى للأضرار على الانسان والبيئة
الاستخدام العشوائى هيخلى في وجود بقايا كيميائية على الثمار وخاصة لو ما راعيناش فترة ما قبل الحصاد
لما نتعرض مباشرة للمادة المركزة ممكن يحصل تهيج للجلد والعينين وصعوبة التنفس عشان كدة لازم نستخدم معدات الحماية الشخصية
هيلوث المياه السطحية او الجوفية لو استخدمناه بكميات كبيرة
طب نتجنب ده كله ازاى
نلتزم بالجرعات المحدده لكل محصول
لازم من معدات الوقاية
نلتزم بفترة الأمان قبل الحصاد
تعالو نعرف ايه المحاصيل اللى بيستخدم فيها
بيستخدم على كتير من المحاصيل الزراعية زى
الفواكه والخضروات ( الطماطم ، الموز ، الاناناس ، المانجو ، التفاح )
عشان نسرع النضج ونحسن الجودة ونحفز الجودة
بس ناخد بالنا التركيز بيختلف من محصول لآخر
المحاصيل الزيتية زى ( القصن ، فول الصويا )
عشان نشيل الأوراق ويسرع تساقط الأوراق ويسهل جمع المحصول
وفى الخيار عشان نحفز التزهير الانثوى
البطيخ و الكنتالوب عشان نحسن التزهير وإنتاج الثمار
المحاصيل الخضرية عشان ننظم الازهار
وكمان في محاصيل أخرى زى شجر المطاط عشان نزود انتاج اللاتكس
وفى الطماطم الكرزية بتسرع النضج للحصول على محصول موحد
واكتبولنا في التعليقات اية المبيدات الا بتستخدموها بتحتوى على مادة الايثريل
